Kalidou Koulibaly, varnarmaður ítalska knattspyrnufélagsins Napoli, hefur verið sterklega orðaður við ensku úrvalsdeildina að undanförnu. Þá hafa nýkrýndir Englandsmeistarar Liverpool sagðir vera líklegasti áfangastaður miðvarðarins en samkvæmt heimildum Sky Sports er lítið til í því.
Koulibaly er samningsbundinn Napoli til sumarsins 2023 en ítalska félagið er tilbúið að selja Senegalann fyrir 90 milljónir punda í sumar samkvæmt ítalska fjölmiðlinum Corriere dello Sport. Hann hefur verið sterklega orðaður við Liverpool undanfarnar vikur, en enskir fjölmiðlar greindu frá því að Jürgen Klopp vildi fá varnarmanninn til þess að spila með Virgil van Dijk í hjarta varnarinnar á næstu leiktíð.
Félagið ætlar sér hins vegar ekki að gera stór kaup á leikmannamarkaðnum í sumar og er það einfaldlega stefna félagsins að eyða ekki meiru en 60 milljónum punda í leikmann sem er orðinn 29 ára gamall. Express sagði frá því í vikunni að Manchester-félögin, City og United, myndu berjast um undirskrift Senegalans í sumar.