Bayern München er þýskur bikarmeistari í fótbolta annað árið í röð og tuttugasta skipti alls eftir 4:2-sigur á Bayer Leverkusen á Ólympíuleikvanginum í Berlín í dag.
Bayern var með 2:0-forskot í hálfleik en David Alaba skoraði fyrsta markið úr fallegri aukaspyrnu. Serge Gnabry bætti við öðru marki á 24. mínútu er hann slapp einn í gegn eftir sendingu Joshua Kimmich.
Póslki markahrókurinn Robert Lewandowski bætti við þriðja marki Bayern á 59. mínútu með langskoti. Skaut hann beint á finnska landsliðsmarkvörðinn Lukás Hrádecký af löngu færi en sá finnski missti boltann afar klaufalega úr höndunum og í markið.
Sven Bender gaf Leverkusen smá von á 63. mínútu með skalla eftir hornspyrnu en það dugði skammt því Lewandowski skoraði sitt annað mark á 89. mínútu eftir sendingu frá Ivan Perisic.
Kai Havertz lagaði stöðuna í uppbótartíma en 4:2-sigur Bayern varð staðreynd og hefur liðið því unnið tvöfalt tvö ár í röð.