Enska knattspyrnufélagið Chelsea er að vinna kapphlaupið um einn eftirsóttasta leikmann heims, Kai Havertz sem spilar fyrir Leverkusen en forráðamenn félaganna eru þó sagðir þrefa um kaupverðið á sóknarmanninum.
Rudi Völler, yfirmaður knattspyrnumála hjá Bayer Leverkusen, staðfesti í samtali við Bild á dögunum að Havertz er frjálst að yfirgefa félagið, berist því gott tilboð. Sky Sports segir þýska félagið vilja 100 milljónir evra en forráðamenn Lundúnaliðsins vilja prútta eitthvað, borga minna í fyrstu og jafnvel semja um einhverjar bónus greiðslur í framhaldinu. Þrátt fyrir ungan aldur á Havertz að baki 147 leiki fyrir félagið í öllum keppnum þar sem hann hefur skorað 44 mörk og lagt upp 31 mark fyrir liðsfélaga sína. Þá hefur hann leikið sjö landsleiki fyrir Þýskaland þar sem hann hefur skorað eitt mark.
Havertz er uppalinn hjá Leverkusen en hann sjálfur er sagður ætlar taka ákvörðun um framtíð sína þegar ensku úrvalsdeildinni er lokið. Heimildir Goal herma að Havertz vilji aðeins ganga til liðs við Chelsea ef Lundúnaliðinu tekst að vinna sér inn sæti í Meistaradeild Evrópu á næstu leiktíð.