Real Madrid er fimm stigum frá því að tryggja sér spænska meistaratitilinn í fótbolta eftir 2:0-sigur á Alavés á heimavelli í spænsku 1. deildinni í kvöld.
Frakkinn Karim Benzema kom Real Madrid á bragðið á elleftu mínútu með marki úr vítaspyrnu og var staðan í leikhléi 1:0. Marco Asensio bætti við öðru marki á 50. mínútu, eftir undirbúning Benzema, og þar við sat.
Real er með fjögurra stiga forskot á Barcelona á toppi deildarinnar þegar aðeins þrjár umferðir eru eftir. Er Real með 80 stig og Barcelona 76 stig.