Knattspyrnumaðurinn Albert Guðmundsson virðist vera í fínu standi en hann hefur komið við sögu í öllum æfingaleikjum AZ Alkmaar í Hollandi í sumar.
Albert kom aðeins við sögu í fjórum leikjum með AZ Alkmaar í hollensku úrvalsdeildinni á síðasta tímabili áður en deildinni var aflýst vegna kórónuveirufaraldursins. Hann er 22 ára gamall og fór meiddur af velli í leik í september á síðasta ári. Við nánari skoðun kom í ljós að leikmaðurinn hafði brotið bein í ökkla og að hann yrði frá í fjóra til fimm mánaða en þegar Albert var að snúa aftur var gert hlé á fótboltanum í Evrópu vegna kórónuveirunnar.
Hann var í byrjunarliðinu í dag gegn Zwolle og var tekinn af velli á 54. mínútu en AZ Alkmaar tapaði leiknum 1:0. Þar áður spilaði hann hálfleik í leikjum gegn Genk og Utrecht. Hollenska deildin fer aftur af stað í september.