Knattspyrnustjarnan Gareth Bale verður ekki með Real Madríd sem mætir Manchester City í Meistaradeild Evrópu á föstudaginn. Samkvæmt þjálfara hans er það einfaldlega vegna þess að hann vill ekki spila.
Walesverjinn hefur átt erfitt uppdráttar undanfarið í spænsku höfuðborginni, aðeins spilað 20 leiki á tímabilinu og skoraði í þeim þremur mörk. Real varð spænskur meistari á dögunum og mætir City í síðari viðureign liðanna í 16-liða úrslitum Meistaradeildarinnar á Englandi eftir tvo daga.
City er 2:1-yfir eftir fyrri leikinn, sem var spilaður í mars, en Zinedine Zidane, stjóri Real, er búinn að velja þá 24 leikmenn sem ferðast til Manchester. Bale, sem varð dýrasti leikmaður heims þegar Real keypti hann árið 2013, er ekki í hópnum.
Zidane hefur útskýrt nú mál sitt á blaðamannafundi fyrir einvígið en hann segir að Bale vilji einfaldlega ekki spila. „Það eina sem ég get sagt er að hann vildi ekki spila, annað sem fór okkar á milli er okkar á milli. Það er virðing á milli okkar, frá leikmanni til þjálfara,“ sagði Zidane.
Jonathan Barnett, umboðsmaður Bale, segir að Walesverjinn vilji ekki fara frá félaginu enda eigi hann tvö ár eftir af samningi sínum. Sögusagnir hafa verið á kreiki um að framherjinn vilji snúa aftur til ensku úrvalsdeildarinnar, þar sem hann átti frábær ár með Tottenham.