Franska knattspyrnufélagið Amiens vill fá Boli Bolingoli að láni frá Celtic eftir að leikmaðurinn kom sér í klandur í Skotlandi á dögunum.
Bolingoli braut sóttvarnareglur þegar hann ferðaðist til Spánar í síðustu viku án þess að láta félagið vita og spilaði svo með Celtic gegn Kilmarnock á sunnudaginn, án þess að hann hefði farið í sóttkví. Forsætisráðherra Skota var öskuill og setti Celtic meðal annars í tveggja leika keppnisbann en liðið getur þó tekið á móti Íslandsmeisturum KR í fyrstu umferð Meistaradeildar Evrópu í næstu viku.
Bolingoli er hins vegar ekki í náðinni hjá félaginu og vilja forráðamenn Celtic losna við vandræðagemlinginn. Amiens, sem spilar í frönsku B-deildinni, hefur boðist til að taka Belgann að láni og þá gæti félagið keypt hann fyrir tvær milljónir punda eftir tímabilið. Sky Sports segir frá þessu.