Sverrir Ingi Ingason, landsliðsmaður Íslands í knattspyrnu og leikmaður gríska knattspynufélagsins PAOK, var í byrjunarliði gríska liðsins þegar það fékk Benfica í heimsókn í 3. umferð undankeppni Meistaradeildarinnar á Toumba-völlinn í Grikklandi í kvöld.
Leiknum lauk með 2:1-sigri PAOK en Sverrir Ingi lék allan leikinn hægra megin í þriggja manna varnarlínu gríska liðsins.
Dimitrios Giannoulis og Andrija Zivkovic skoruðu mörk PAOK um miðjan síðari hálfleikinn áður en Rafa Silva minnkaði muninn fyrir Benfica í uppbótartíma.
PAOK er því komið áfram í umspil um laust sæti í riðlakeppni Meistaradeildarinnar en þar mætir PAOK Krasnodar frá Rússlandi.
Leikirnir fara fram dagana 22.-23. september og 29.-30. september næstkomandi en ólíkt því sem verið hefur vegna kórónuveirufaraldursins verða tveir leikir, heima og ytra eins og tíðkast hefur í undankeppni Meistaradeildarinnar undanfarin ár.