Hólmar Örn Eyjólfsson, landsliðsmaður í knattspyrnu, er snúinn aftur til norska félagsins Rosenborg en hann hefur leikið undanfarin þrjú tímabil með Levski Sofia í Búlgaríu. Félagið staðfesti þetta á heimasíðu sinni í morgun.
Hólmar, 30 ára, lék með Rosenborg frá 2014 til 2016 og vann norska meistaratitilinn tvisvar með liðinu. Þrándheimsliðið er nú í fjórða sæti úrvalsdeildarinnar þegar 17 umferðir af 30 hafa verið leiknar á þessu tímabili. Þá er Rosenborg komið áfram í 3. umferð Evrópudeildarinnar en liðið vann Ventspils í Lettlandi 5:1 í fyrradag.