Evrópumeistarar Bayern München og Lyon voru í aðalhlutverkum í dag þegar bestu leikmenn í Meistaradeildum karla og kvenna í fótbolta voru heiðraðir í verðlaunahófi UEFA og Samtaka evrópskra íþróttafjölmiðla, ESM, í Sviss í dag.
Þrír leikmenn af fjórum í karlaflokki koma frá Bayern og þrír af fjórum í kvennaflokki frá Lyon.
Sara Björk Gunnarsdóttir landsliðsfyrirliði Íslands var í hópi þriggja miðjumanna sem komu til greina í kjörinu á besta miðjumanninum í Meistaradeild kvenna. Liðsfélagi hennar Dzsenifer Marozsán frá Þýskalandi varð fyrir valinu.
Bestu leikmenn í einstökum stöðum eru eftirtaldir - en á eftir verður tilkynnt hver urðu fyrir valinu sem besti knattspyrnumaður og besta knattspyrnukona Evrópu tímabilið 2019-20.
Þar koma til greina Kevin De Bruyne, Robert Lewandowski og Manuel Neuer hjá körlunum en Lucy Bronze, Pernille Harder og Wendie Renard hjá konunum.
Bestu leikmennirnir í Meistaradeild karla:
Markvörður: Manuel Neuer, Bayern München
Varnarmaður: Joshua Kimmich, Bayern München
Miðjumaður: Kevin De Bruyne, Manchester City
Sóknarmaður: Robert Lewandowski, Bayern München
Bestu leikmennirnir í Meistaradeild kvenna:
Markvörður: Sarah Bouhaddi, Lyon
Varnarmaður: Wendie Renard, Lyon
Miðjumaður: Dzsenifer Marozsán, Lyon
Sóknarmaður: Pernille Harder, Wolfsburg