Landsliðsmaðurinn Mikael Anderson var ekki í leikmannahópi danska úrvalsdeildarfélagsins Midtjylland í gær þar sem hann var í agabanni.
Það er danski miðillinn Ekstrabladet sem greinir frá þessu en Midtjylland heimsótti Randers í dönsku úrvalsdeildinni í gær.
Samkvæmt frétt Ekstrabladet lenti Mikael og Sory Kaba, sóknarmanni Midtjylland, saman á æfingu liðsins í vikunni þar sem þeir létu hnefana tala.
Þeir voru báðir reknir heim af æfingu liðsins og ekki valdir í hópinn fyrir leikinn gegn Randers sem lauk með 2:1-sigri Midtjylland.
„Ég ætla ekki að tjá mig sérstaklega um þetta mál og það eina sem ég mun segja er að þeir voru ekki valdir í hópinn í kvöld,“ sagði Brian Priske, þjálfari Midtjylland, í samtali við danska fjölmiðla.
„Ég vel þann leikmannahóp sem ég tel líklegastan til þess að ná í stig fyrir okkur og það tókst í kvöld.
Það sem gerist innan félagsins er leyst innan félagsins og þannig hefur það alltaf verið,“ bætti þjálfarinn við.
Mikael hefur verið fastamaður í leikmannahópi Midtjylland á tímabilinu en hann er einungis 22 ára gamall. Hann á að baki sjö A-landsleiki fyrir Ísland.