Knattspyrnumaðurinn Guðlaugur Victor Pálsson er á óskalista þýska fyrstudeildarfélagsins Schalke samkvæmt heimildum mbl.is.
Miðjumaðurinn, sem er 29 ára gamall, er samningsbundinn Darmstadt í þýsku B-deildinni en samningur hans við þýska félagið rennur út sumarið 2022.
Guðlaugur hefur byrjað tólf leiki í þýsku B-deildinni á tímabilinu þar sem hann hefur skorað þrjú mörk en Darmstadt er í tólfta sæti deildarinnar með 35 stig.
Guðlaugur gekk til liðs við Darmstadt frá Zürich í janúar 2019 en hann hefur einnig leikið fyrir lið á borð við Hibernian í Skotlandi, New York Red Bulls í Bandaríkjunum, NEC í Hollandi, Helsingborg í Svíþjóð og Esbjerg í Danmörku á ferlinum.
Þá hefur hann verið einn af lykilmönnum íslenska landsliðsins undanfarið árið en hann á að baki 26 A-landsleiki þar sem hann hefur skorað eitt mark.
Darmstadt gæti neyðst til að selja Guðlaug í sumar þar sem hann hefur ekki skrifað undir nýjan samning við félagið því annars á félagið það á hættu að missa hann frítt sumarið 2022.
Schalke er sögufrægur klúbbur í Þýskalandi en liðið er í miklum vandræðum í neðsta sæti þýsku 1. deildarinnar með 13 stig, 13 stigum frá öruggu sæti, þegar sex umferðir eru eftir af tímabilinu.
Félagið hefur sjö sinnum orðið Þýskalandsmeistari og fimm sinnum bikarmeistari.