Deildarmeistarar í fyrsta sinn í tæpa tvo áratugi

Leikmenn Sporting fagna deildarmeistaratitlinum innilega í gærkvöldi.
Leikmenn Sporting fagna deildarmeistaratitlinum innilega í gærkvöldi. AFP

Knattspyrnuliðið Sporting frá Lissabon tryggði sér í gær portúgalska meistaratitilinn með því að leggja Boavista 1:0 að velli í gærkvöldi. Um er að ræða fyrsta deildarmeistaratitil félagsins síðan árið 2002, fyrir 19 árum síðan.

Erkifjendur liðsins í Porto og Benfica hafa einokað portúgölsku deildina síðustu tvo áratugi, þar sem Porto hefur unnið hana 11 sinnum og Benfica sjö sinnum.

Á yfirstandandi tímabili hefur Sporting hins vegar ráðið lögum og lofum og verið á toppnum nánast allan tímann.

Þar hefur farið fremstur í flokki sóknartengiliðurinn Pedro Goncalves, sem var ætlað að fylla skarðið sem Bruno Fernandes skildi eftir sig þegar hann samdi við Manchester United í janúar 2020.

Hefur hann sannarlegar staðið undir þeim væntingum en Goncalves er búinn að skora 18 mörk í 30 leikjum í deildinni, auk þess að leggja upp önnur fjögur.

Með sigrinum í gærkvöldi, þar sem Paulinho skoraði sigurmarkið, varð það ljóst að Porto getur ekki lengur náð Sporting, sem er með átta stiga forystu þegar tveimur umferðum er ólokið.

mbl.is