Kólumbía vann Ekvador með minnsta mun, 1:0, þegar liðin mættust í B-riðli Ameríkubikarsins í knattspyrnu karla í nótt.
Vængmaðurinn Edwin Cardona skoraði sigurmark Kólumbíumanna skömmu fyrir leikhlé eftir sendingu frá Miguel Borja.
Í gærkvöldi unnu nýtilkomnir gestgjafar Brasilíu öruggan 3:0 sigur á vængbrotnu liði Venesúela í riðlinum.
Er Brasilía því á toppi B-riðils og Kólumbía í öðru sæti.
Fimm lið eru í riðlinum og fara fjögur þeirra áfram í átta liða úrslit keppninnar.
Keppni í A-riðlinum hefst í kvöld klukkan 21 þegar Argentína mætir Síle. Á miðnætti mætast svo Paragvæ og Bólivía.