Alls voru fjórir leikmenn fjarverandi á æfingu þýska karlalandsliðsins í knattspyrnu í morgun og er því óvíst með þátttöku þeirra í lokaumferð F-riðils Evrópumótsins í fótbolta á miðvikudaginn.
Þetta eru þeir Thomas Müller, Mats Hummels, Ilkay Gündogan og Lukas Klostermann.
Müller er að glíma við meiðsli á hnéskel og mun missa af leik Þýskalands gegn Ungverjalandi á miðvikudaginn og hugsanlega leik liðsins í 16-liða úrslitum, komist liðið þangað.
Svokallað hopparahné er svo að stríða Hummels á meðan Gündogan glímir við meiðsli á kálfa. Þá er Klostermann að glíma við vöðvameiðsli. Óvíst er hvort þeir geti tekið þátt í leiknum á miðvikudag.
Þeir þrír fyrstnefndu eru allir lykilmenn í liði Þýskalands en Klostermann hefur hins vegar ekki komið við sögu í fyrstu tveimur leikjum liðsins á EM.