Sænsku Íslendingaliðin Hammarby og Elfsborg standa vel að vígi í 2. umferð Sambandsdeildar karla í fótbolta eftir góða sigra í fyrri leikjunum á heimavöllum sínum í dag.
Hammarby tók á móti Maribor frá Slóveníu í Stokkhólmi og sigraði 3:1. Astrik Seljmani var hetja Hammarby en hann skoraði öll þrjú mörkin, það síðasta úr vítaspyrnu á 87. mínútu. Jón Guðni Fjóluson lék allan leikinn í vörn Hammarby.
Elfsborg tók á móti Milsami Orhei frá Moldóvu á heimavelli sínum í Borås og vann stórsigur, 4:0. Staðan var 3:0 í hálfleik og í seinni hálfleiknum voru þrír leikmenn Moldóvanna reknir af velli. Gegn átta mótherjum skoraði Elfsborg þó aðeins eitt mark í viðbót og lokatölur urðu 4:0.
Hákon Rafn Valdimarsson er nýkominn til liðs við Elfsborg frá Gróttu og hann var varamarkvörður liðsins í leiknum.