Mexíkó gerði sér lítið fyrir og vann 4:1-sigur á Frakklandi í fyrsta leik liðanna í knattspyrnukeppni Ólympíuleikanna í Tókýó í morgun.
Alexis Vega og Sebastián Córdova komu Mexíkó í 2:0 áður en André-Pierre Gignac lagaði stöðuna fyrir Frakkland úr vítaspyrnu. Það dugði skammt því Uriel Antuna og Eduardo Aguirre bættu við mörkum fyrir Mexíkó.
Spánverjum mistókst að vinna Egypta, en lokatölur urðu 0:0. Þá vann Nýja-Sjáland 1:0-sigur á Suður-Kóreu. Chris Wood, framherji Burnley í ensku úrvalsdeildinni, skoraði sigurmark Nýja-Sjálands á 60. mínútu.