Hollenska knattspyrnusambandið hefur staðfest ráðninguna á Louis van Gaal sem nýjum aðalþjálfara karlalandsliðsins. Tekur hann við liðinu í þriðja skipti á þjálfaraferli sínum.
Þjálfarastaðan varð laus eftir að Frank de Boer sagði starfi sínu lausu eftir að Holland féll úr keppni í 16-liða úrslitum Evrópumótsins.
Ráðningin hefur legið í loftinu í tæpan mánuð og hefur nú verið staðfest.
Van Gaal stýrði hollenska landsliðinu fyrst frá 2000 til 2002 og síðan 2012 til 2014. Undir hans stjórn lentu Hollendingar í þriðja sæti á HM 2014.
Van Gaal gerði Ajax að Evrópumeisturum árið 1995 og hollenskum meisturum þrisvar frá 1994 til 1996. Þá gerði hann Barcelona tvisvar að spænskum meistara, AZ Alkmaar einu sinni að hollenskum meistara og Bayern München að Þýskalandsmeistara.