UEFA sektar Manchester United og West Ham

Stuðningsmenn West Ham og Rapid Vín hegðuðu sér illa á …
Stuðningsmenn West Ham og Rapid Vín hegðuðu sér illa á leik liðanna. AFP

Knattspyrnusamband Evrópu, UEFA, hefur ákveðið að sekta ensku félögin Manchester United og West Ham United vegna óspekta áhorfenda á Evrópuleikjum.

Man United hefur verið sektað um samtals 7.058 pund eftir að stuðningsmenn liðsins köstuðu hlutum inn á Old Trafford og réðust inn á völlinni þegar liðið vann 2:1 sigur gegn Villarreal í Meistaradeild Evrópu.

Sekt West Ham er umtalsvert hærri, 50.567 pund. Sektina fékk liðið vegna óláta stuðningsmanna bæði West Ham og Rapid Vín frá Austurríki í 2:0 sigri West Ham í Evrópudeildinni á London-velli félagsins.

Stuðningsmenn beggja liða köstuðu hlutum auk þess sem stuðningsmenn Rapid höfðu stokkið yfir tálma sem aðskildu stuðningsmenn liðanna þar sem þeir ögruðu stuðningsmönnum West Ham.

mbl.is