Noregur vann afar öruggan 10:0 sigur á Armeníu í F-riðli undankeppni HM 2023 í knattspyrnu kvenna. Leikurinn var flautaður af vegna mikillar þoku í Jerevan í gærkvöldi og þurfti að ljúka leiknum nú í morgun.
Staðan var nýorðin 9:0, Noregi í vil, þegar 21 mínúta lifði leiks í gærkvöldi. Leiknum var þá hætt þar sem skyggni á vellinum var nánast ekkert vegna þoku.
Í morgun var leikurinn kláraður og bætti Noregur þá við einu marki. Það skoraði Ingrid Engen úr vítaspyrnu á 81. mínútu.
Noregur er eftir sigurinn áfram á toppi F-riðils, þremur stigum á undan Belgíu í öðru sætinu.