Nottingham Forest tryggði sér í kvöld sæti í úrslitaleik umspils B-deildar karla í knattspyrnu með sigri í vítaspyrnukeppni gegn Sheffield United í öðrum leik liðanna í undanúrslitum umspilsins í Nottingham í kvöld.
Forest vann fyrri leikinn í Sheffield 2:1.
Brennan Johnson, tvítugur sóknarmaður Forest, kom heimamönnum yfir á 19. mínútu leiksins.
Strax í upphafi síðari hálfleiks jafnaði Morgan Gibbs-White metin fyrir Sheffield United.
Á 75. mínútu kom John Fleck gestunum frá Sheffield í 2:1-forystu og knúði þannig fram framlengingu.
Í henni var ekkert skorað og því þurfti vítaspyrnukeppni til þess að knýja fram úrslit.
Í vítaspyrnukeppninni varði Brice Samba í marki Forest fyrstu tvær vítaspyrnur Sheffield United á meðan Forest skoraði úr fyrstu þremur spyrnum sínum.
Sheffield skoraði svo úr næstu tveimur spyrnum sínum á meðan Forest klúðraði einni.
Samba gerði sér svo lítið fyrir og varði sömuleiðis fimmtu spyrnu Sheffield og tryggði þannig Forest 3:2-sigur í vítaspyrnukeppninni.
Forest mun mæta Huddersfield Town í úrslitaleiknum um eitt laust sæti í ensku úrvalsdeildinni. Úrslitaleikurinn fer fram þann 29. maí næstkomandi á Wembley-leikvanginum í Lundúnum.