Stuðningsmaður Forest í fangelsi eftir árás á leikmann
Setja bókamerki
Lögreglan í Nottingham hefur haft hendur í hári stuðningsmanns Nottingham Forest sem skallaði Billy Sharp, leikmann Sheffield United, af öllu afli eftir að Forest hafði betur gegn Sheffield United í öðrum leik undanúrslita umspils ensku B-deildarinnar í knattspyrnu karla á þriðjudagskvöld.
Robert Biggs, þrítugur ársmiðahafi hjá Forest, var handtekinn og gekkst við broti sínu fyrir rétti í Nottingham í dag. Mun hann sitja í fangelsi í 24 vikur.
Biggs hljóp inn á City Ground, heimavöll, Forest, eftir að liðið vann Sheffield United í vítaspyrnukeppni og tryggði sér þannig sæti í úrslitaleiknum um eitt laust sæti í ensku úrvalsdeildinni.
Þar skallaði hann Sharp svo harkalega að sauma þurfti fjögur spor í vör hans.
Biggs þarf að greiða Sharp 500 pund í miskabætur, 85 pund í málskostnað og 128 pund til viðbótar vegna þess áfalls sem Sharp varð fyrir.
Þá hefur Nottingham Forest bannað hann ævilangt og var hann sömuleiðis úrskurðaður í 10 ára bann frá öllum afskiptum af fótbolta af réttinum í Nottingham.
Allar rúður brotnar hjá Fiskikónginum
„Hvað ef það hefði verið lokuð heiði?“
Aukin tíðni þungunarrofa hjá yngsta aldurshópnum
„Þögnin er ærandi“
Sat á þaki byggingarinnar þegar eldurinn kviknaði
Starfsfólk gæti fengið reikning frá Skattinum