Gamla ljósmyndin: Big Shuggie
Setja bókamerki
Íþróttadeild Morgunblaðsins og mbl.is heldur áfram að gramsa í myndasafni Morgunblaðsins og birta á mbl.is á laugardögum.
Á myndinni er Jóhannes Eðvaldsson aðgangsharður við mark Íra á Laugardalsvelli 21. september 1983 í undankeppni EM. Írar unnu 3:0 og voru með leikmenn í liðinu sem voru áberandi í ensku knattspyrnunni á þessum árum eins og Liam Brady, Frank Stapleton, Kevin Moran og Mark Lawrenson svo einhverjir séu nefndir.
Lawrenson sem varð Evrópumeistari með Liverpool ári síðar er í baráttu við Jóhannes á myndinni sem Friðþjófur Helgason tók og birtist í Morgunblaðinu daginn eftir leikinn. Janus Guðlaugsson og Lárus Guðmundsson eru einnig á myndinni. Á milli fjórtán og fimmtán þúsund manns sáu leikinn á Laugardalsvelli samkvæmt umfjöllun Morgunblaðsins.
Jóhannes hóf meistaraflokksferilinn með Val árið 1968 og lék fyrir liðið á árunum 1968 til 1974. Þá lék hann með Cape Town City í Suður-Afríku, Holbæk í Danmörku, Tulsa í Bandaríkjunum, Hannover í Þýskalandi og Motherwell í Skotlandi og lauk ferlinum sem spilandi þjálfari Þróttar í efstu deild sumarið 1985.
Skrautfjöðurinn á atvinnumannaferli Jóhannesar var hins vegar árangur hans með hinu kunna skoska liði Glasgow Celtic. Jóhannes lék með liðinu 1975-1980 og varð skoskur meistari 1977 og 1979. Jóhannes lék 188 leiki með Celtic og skoraði í þeim 36 mörk en hann naut mikilla vinsælda hjá stuðningsmönnum félagsins og gekk undir viðurnefninu „Big Shuggie“ meðal þeirra.
/frimg/1/26/25/1262513.jpg)
Jóhannes lék 34 landsleiki fyrir Ísland, þar af 27 sem fyrirliði, og skoraði tvö mörk. Annað þeirra er eitt eftirminnilegasta mark í landsleikjasögu Íslands en það gerði hann með hjólhestaspyrnu í 2:1 sigrinum óvænta á Austur-Þýskalandi í undankeppni EM á Laugardalsvellinum í júní 1975.
Í lok árs 1975 hlaut hann sæmdarheitið Íþróttamaður ársins hjá Samtökum íþróttafréttamanna og hafnaði auk þess í öðru sæti í kjörinu árið áður.
„Á réttri leið en nokkuð í land ennþá“
Verðbólgan komin niður í 6%
Tóku upp hanskann fyrir leikskólabörn
Skemmtiferðaskip hætt komið nærri Viðey
„Það þarf að vinna mikinn fjölda upp“
„Okkur miðar í rétta átt“
Handtekin eftir að tvö börn fundust látin