Knattspyrnumennirnir Rhian Brewster og Oli McBurnie, sóknarmenn enska B-deildarliðsins Sheffield United, hafa verið kærðir af lögreglunni í Nottinghamskíri í tengslum við atvik sem átti sér stað eftir að stuðningsmenn Nottingham Forest réðust inn á City Ground-völlinn eftir leik liðanna.
Forest og Sheffield United mættust í undanúrslitum umspils um laust sæti í ensku úrvalsdeildinni í síðasta mánuði og hafði Forest betur í vítaspyrnukeppni á velli sínum í síðari leik liðanna.
Þar hljóp til að mynda stuðningsmaður Forest inn á völlinn og skallaði Billy Sharp, annan sóknarmann Sheffield United, af öllu afli í andlitið svo sauma þurfti nokkur spor í vör Sharps.
Sá maður var handtekinn og situr nú í fangelsi eftir að hafa verið dæmdur fyrir líkamsárás.
Brewster og McBurnie sáust eiga í deilum við stuðningsmenn Forest á meðann innrásinni á völlinn stóð og fóru í skýrslutöku til lögreglunnar vegna þess.
Ákvað lögreglan í Nottinghamskíri í kjölfarið að leggja fram kæru í garð Brewsters og McBurnie.
Í yfirlýsingu frá Sheffield United sagði að báðir leikmenn hafni alfarið ásökununum í sinn garð, auk þess sem félagið lýsti yfir gífurlegum vonbrigðum yfir því að leikmennirnir, sem hafi af fúsum og frjálsum vilja farið í skýrslutökur, hafi verið kærðir.