Ítalía, einn andstæðinga íslenska kvennalandsliðsins í knattspyrnu á EM 2022 á Englandi, lék í dag vináttulandsleik gegn Spáni og skildu liðin jöfn, 1:1.
Valentina Bergamaschi, samherji Guðnýjar Árnadóttur hjá AC Milan, kom Ítalíu yfir strax í upphafi síðari hálfleiks.
Um miðjan hálfleikinn jafnaði Alexia Putellas, besti leikmaður heims, metin fyrir Spán og þar við sat.
Bæði lið undirbúa sig nú af kappi fyrir EM sem hefst í næstu viku.
Ítalía er sem áður segir með Íslandi í riðli ásamt Frakklandi og Belgíu. Ísland og Ítalía mætast í öðrum leik sínum í D-riðli þann 14. júlí næstkomandi.
Spánn er í B-riðli með Þýskalandi, Danmörku og Finnlandi.