Franska knattspyrnufélagið París Saint-Germain staðfesti rétt í þessu að knattspyrnustjórinn Mauricio Pocchettino hefði lokið störfum hjá félaginu.
Pochettino er fimmtugur Argentínumaður sem tók við þjálfarastöðunni hjá PSG í ársbyrjun 2021 og samdi til átján mánaða. Sá samningur var hálfu ári síðar framlengdur um eitt ár og átti að gilda til sumarsins 2023.
Hann stýrði áður Tottenham í fimm ár og var þar á undan stjóri Southampton og spænska félagsins Espanyol.
París SG vann franska meistaratitilinn með yfirburðum á síðasta tímabili og varð bikarmeistari undir stjórn Pochettino á síðasta ári. Félagið hefur hinsvegar ekki náð þeim markmiðum sínum að vinna Meistaradeild Evrópu.
Reiknað er með að Christophe Galtier taki við starfinu en hann hætti hjá Nice í síðustu viku.