Albert Guðmundsson og liðsfélagar hans í Genoa höfðu betur gegn Íslendingaliði Venezia þegar liðin mættust í fyrstu umferð ítölsku B-deildarinnar í knattspyrnu karla í kvöld. Albert lagði upp sigurmark Genoa í 2:1-sigri.
Manolo Portanova kom gestunum í Genoa yfir skömmu fyrir leikhlé.
Varamaðurinn Dennis Törset Johnsen jafnaði metin fyrir Venezia.
Á 87. mínútu lagði Albert svo upp sigurmark Genoa þegar varamaðurinn Kelvin Yeboah skoraði.
Albert fór af velli á 90. Mínútu en enginn Íslendingur sem er á mála hjá Venezia kom við sögu í leiknum.
Hilmir Rafn Mikaelsson var ónotaður varamaður og þeir Bjarki Steinn Bjarkason, Kristófer Jónsson og Jakob Franz Pálsson voru ekki í leikmannahópnum að þessu sinni.