Fyrstudeildarfélag í úrvalsdeild

Freyr Alexandersson stýrði Lyngby upp í dönsku úrvalsdeildina í vor …
Freyr Alexandersson stýrði Lyngby upp í dönsku úrvalsdeildina í vor en bíður ennþá eftir fyrsta sigrinum á þessu tímabili. mbl.is/Eggert Jóhannesson

Lyngby, með Frey Alexandersson sem þjálfara og Alfreð Finnbogason og Sævar Atla Magnússon sem framherja, er ekki á sama stað og önnur félög í dönsku úrvalsdeildinni í knattspyrnu hvað varðar fjárhagslega burði.

Lyngby vann sér sæti í deildinni síðasta vor, á fyrsta tímabili Freys sem þjálfara, en hefur ekki unnið leik í fyrstu tíu umferðunum á þessu tímabili og situr á botninum.

Tipsbladet segir í umfjöllun um Lyngby í dag að möguleikarnir á að félagið haldi sér í deildinni séu mjög litlir, sérstaklega vegna þess að það sé í raun rekið sem 1. deildarfélag í úrvalsdeild. Þegar rekstur allra atvinnuliða í Danmörku sé skoðaður sé Lyngby aðeins í sautjánda sæti, neðst þeirra tólf félaga sem skipa úrvalsdeildina, og 1. deildarfélög eins og Vejle og SönderjyskE séu með meira umfang í sínum rekstri og leikmannamálum.

Þá sé reynslan sú að eigendur Lyngby séu ekki tilbúnir til að spenna bogann of hátt í peningamálunum, jafnvel þó það geti kostað félagið fall úr úrvalsdeildinni eftir eins árs dvöl. 

Mathias Kristensen, sem Lyngby keypti af Nyköbing í sumar, kostaði um 15 milljónir íslenskra króna og er dýrasti leikmaðurinn í sögu félagsins. Alfreð kom til félagsins án greiðslu þar sem samningur hans við Augsburg rann út í sumar.

Tipsbladet segir að helstu framtíðarvonir Lyngby séu fólgnar í því að erlendir fjárfestar sem vilji gera sig gildandi í Kaupmannahöfn og nágrenni en séu ekki tilbúnir til að greiða fáránlegar upphæðir fyrir FC Köbenhavn eða Bröndby, átti sig á því að Lyngby gæti verið vænlegur kostur. Að öðrum kosti sé erfitt að sjá fyrir sér að Lyngby geti tekið það skref að verða alvöru úrvalsdeildarfélag.

mbl.is