Sádiarabíska knattspyrnufélagið Al-Nassr hefur boðið portúgalska sóknarmanninum Cristiano Ronaldo samning.
Áður hefur verið greint frá áhuga Al-Hilal, sem leikur einnig í úrvalsdeildinni í Sádi-Arabíu, en Ronaldo hafnaði 305 milljóna punda tilboði félagsins í sumar.
Samkvæmt sádi-arabíska dagblaðinu Asharq al-Awsat hefur Al-Nassr hins vegar boðið Ronaldo samning sem hljóðar upp á 225 milljónir evra, en ekki kemur fram hversu langur samningurinn yrði.
Samkvæmt heimildamönnum blaðsins eru viðræður komnar langt á veg en þar segir þó að Ronaldo vilji ekki ræða framtíð sína fyrr en að HM í Katar loknu.
Ronaldo er án félags eftir að samningi hans við Manchester United var rift.