Juventus tapaði óvænt fyrir nýliðum í efstu deild, Monza, 0:2, í ítölsku A-deildinni í fótbolta á heimavelli í dag.
Patrick Ciurria kom Monza yfir á 18. mínútu leiksins og á 39. mínútu voru gestirnir búnir að tvöfalda forystu sína, 2:0, þökk sé marki frá Dany Mota. Þrátt fyrir fjórar breytingar Massimilliano Allegri, knattspyrnustjóra Juventus, í byrjun seinni hálfleiksins komst Juveliðið engu nær marki og 2:0 urðu lokatölur.
Fyrr í þessum mánuði voru 15 stig tekin af Juventus vegna meintra svika tengdum kaupum og sölum á leikmönnum hjá félaginu. Áður var liðið í þriðja sæti, tíu stigum á eftir toppliði Napólí, en eftir þetta tap er gamla konan í 12. sæti deildarinnar með 23 stig.
Monza komst með sigrinum fyrir ofan Juventus og er í 11. sæti deildarinnar með 25 stig.