Þýska ungstirnið Jamal Musiala, leikmaður Bayern München, hefur dregið sig úr landsliðshópi Þjóðverja vegna meiðsla aftan í læri.
Musiala kom inn á í hálfleik í tapi gegn Leverkusen, 2:1, í þýsku 1. deildinni um helgina. Þrátt fyrir að hafa klárað leikinn meiddist hann í honum og hefur nú þurft að draga sig úr þýska landsliðshópnum en Þjóðverjar mæta Perú og Belgíu í vináttuleikjum í komandi landsleikjahléi.
Ekki nóg með að missa af landsleikjunum er Musiala tæpur fyrir stórleik tímabilsins í Þýskalandi, þegar Bayern fær topplið Dortmund í heimsókn þann 1. apríl næstkomandi. Dortmund komst upp fyrir Bayern um helgina með stórsigri á Köln, 6:1.
Dortmund er með eins stigs forskot á Bayern sem getur því endurheimt toppsætið eftir landsleikjahléið.