Vankaður eftir neglu frá Ronaldo (myndskeið)

Portúgalska stórstjarnan Cristiano Ronaldo er býsna skotfastur, eins og einn myndatökumaður fékk að finna rækilega fyrir er Ronaldo og félagar í Al-Nassr unnu 3:1-útisigur á Al-Raed í efstu deild Sádi-Arabíu í fótbolta á laugardag.

Ronaldo tók aukaspyrnu rétt utan teigs, en hún tókst ekki betur en svo að hann negldi boltanum í höfuðið á myndatökumanni sem sinnti starfi sínu fyrir aftan markið.

Vankaðist myndatökumaðurinn, en var annars ekki meint af. Kláraði hann leikinn, án frekari slysa.

Myndskeið af atvikinu má sjá hér fyrir neðan.

• Blogga um frétt