Gerðu lítið úr eigin leikmanni á TikTok (myndskeið)
Setja bókamerki
Ítalíumeistarar Napoli í knattspyrnu karla birtu furðuleg myndbönd af Victor Osimhen, helsta markaskorara liðsins, á samfélagsmiðlinum TikTok í gær.
Ekki er hægt að skilja myndböndin á annan veg en að þau geri lítið úr Osimhen enda í einu þeirra sýnt þegar nígeríski sóknarmaðurinn biður um og fær dæmda vítaspyrnu í leik með Napoli, tekur spyrnuna sjálfur og klúðrar henni svo.
Í öðru myndbandi er Osimhen svo á undarlegan hátt borinn saman við kókoshnetu.
Búið er að eyða báðum myndböndum af opinberum aðgangi Napoli á TikTok en Roberto Calenda, umboðsmaður Osimhen, lét hafa eftir sér í yfirlýsingu í gær að leikmaðurinn íhugaði nú að fara í mál við Napoli.
Osimhen er þá búinn að eyða öllum ljósmyndum af sér í búningi Napoli á Instagram-aðgangi sínum og taka heiti félagsins úr stuttri lýsingu um sjálfan sig á miðlinum.
