Snýr ekki aftur til Real Madrid

Spænski knattspyrnumaðurinn Sergio Ramos er ekki að snúa aftur til Real Madrid, þrátt fyrir meiðslavandræði félagsins.

Það er Sportsmail sem greinir frá þessu en Eder Militao, miðvörður liðsins, sleit krossband á dögunum og leikur því ekki meira með liðinu á tímabilinu.

Bakvörðurinn Dani Carvajal er einnig með slitið krossband og missir af restinni af tímabilinu og þá hefur austurríski miðvörðurinn David Alaba verið frá keppni síðan í desember á síðasta ári eftir að hafa rifið vöðva aftan í læri.

Real Madrid er því ansi fáliðað í öftustu víglínu og hefur Ramos verið orðaður við endurkomu til félagsins í spænskum fjölmiðlum að undanförnu en hann er án félags eftir að samningur hans við Sevilla rann út síðasta sumar.

Ramos er í guðatölu í Madríd en hann lék 671 leik fyrir félagið á árunum 2005 til ársins 2021. Hann varð fimm sinnum Spánarmeistari með liðinu og fjórum sinnum Evrópumeistari.

• Blogga um frétt