Íþróttir | Fótbolti | mbl | 15.4.2025 | 9:48

Mótmæla 64-liða HM

Fjölgun þjóða á HM gæti aukið möguleika íslenska karlalandsliðsins á að komast aftur á mótið. Ljósmynd/Alex Nicodim

Victor Montagliani, forseti knattspyrnusambands Norður- og Mið-Ameríku, hefur gagnrýnt tillögu knattspyrnusambands Suður-Ameríku um að fjölga þátttökuþjóðum á heimsmeistaramóti karla í 64.

HM 2026 í Bandaríkjunum, Mexíkó og Kanada verður fyrsta mótið þar sem 48 þjóðir munu taka þátt en tillaga suðurameríska sambandsins lýtur að því að þjóðunum yrði fjölgað í 64 strax á HM 2030 sem mun fara fram á Spáni, í Marokkó og Portúgal eftir upphafsleiki í Argentínu, Paragvæ og Úrúgvæ.

„Ég hef ekki trú á því að það að fjölga HM karla í 64 lið sé rétta skrefið að taka fyrir mótið sjálft og knattspyrnuheiminn, allt frá landsliðum til keppna félagsliða, deilda og leikmanna.

Við erum ekki einu sinni byrjuð á nýja 48 liða heimsmeistaramótinu þannig að persónulega finnst mér að möguleikinn á 64 liðum ætti ekki einu sinni að vera á borðinu,“ sagði Montagliani í samtali við ESPN.

Aleksander Ceferin, forseti knattspyrnusambands Evrópu, og knattspyrnusamband Asíu hafa sömuleiðis mótmælt tillögu um enn frekari fjölgun liða á HM karla.