Á 13 ára fangelsisdóm yfir höfði sér

Fyrrverandi knattspyrnumaðurinn Ronnie Stam, sem varð enskur bikarmeistari með Wigan árið 2013, gæti átt yfir höfði sér 13 ára fangelsisdóm fyrir stórfellt eiturlyfjasmygl.

Stam, sem er fertugur, var handtekinn í júní á síðasta ári grunaður um að hafa í slagtogi við bróður sinn Rudi smyglað inn samtals tveimur tonnum af kókaíni frá Suður-Ameríku til heimalandsins Hollands.

Frétt af mbl.is

Stam ákærður fyrir stórt eiturlyfjasmygl

Götuvirði slíks magns af kókaíni er um 48 milljónir punda, jafnvirði 8,1 milljarðs íslenskra króna.

Ronnie hefur verið í gæsluvarðhaldi allar götur síðan en Rudi var sleppt úr haldi stuttu eftir handtöku fyrir ári síðan.

Símtöl og ljósmyndir sem sönnunargögn

Bræðurnir mættu fyrir rétt í Breda í Hollandi á þriðjudag þar sem saksóknarar lögðu fram dulkóðuð símtöl milli bræðranna sem sönnunargögn.

Símtölin eru sögð sýna fram á skipulagningu þeirra á eiturlyfjasmygli auk þess sem bræðurnir eru sagðir hafa sent ljósmyndir af kókaíni sín á milli.

Saksóknari fer fram á 13 ára fangelsisvist yfir Ronnie, sem spilaði 62 leiki fyrir Wigan í ensku úrvalsdeildinni, og að hann verði sektaður um 1,44 milljónir punda, 245 milljónir íslenskra króna.

Þá er farið fram á sex ára fangelsisvist yfir Rudi og að hann greiði sömu upphæð í sekt.

• Blogga um frétt