Íþróttir | Fótbolti | mbl | 5.7.2025 | 23:00 | Uppfært 6.7.2025 11:20

Gagnrýna Ronaldo fyrir að mæta ekki í útförina

Cristiano Ronaldo og Diogo Jota. AFP/Miguel Riopa

Cristiano Ronaldo, fyrirliði portúgalska landsliðsins, var ekki viðstaddur þegar Diogo Jota og bróðir hans André Silva voru jarðsungnir í dag.

Bræðurnir létust í bílslysi við bæinn Cernadilla í Zamora-héraði á Spáni. Jota var 28 ára gamall og Silva 25 ára.

Portúgalskir fjölmiðlar gagnrýndu Ronaldo fyrir að mæta ekki í útförina og veltu fyrir af hverju hann væri ekki mættur en Ronaldo og Jota voru liðsfélagar í portúgalska landsliðinu.

„Fjarvera hans verður mikið rædd. Hann þarf að réttlæta hana á næstu dögum,“ sagði fótboltalýsandinn Pedro Fatela.

Portúgalski blaðamaðurinn Luis Cristovao sagði það vera óútskýranlegt að Ronaldo væri ekki mættur í útförina.

Samkvæmt portúgalska fjölmiðlinum A Bola vildi Ronaldo ekki taka sviðsljósið í jarðarförinni og að hann hafi verið í sambandi við Rute Cardoso, eiginkonu Jota, og foreldra bræðranna.