Íþróttir | Fótbolti | mbl | 7.10.2025 | 14:52

Vegabréfinu stolið

Ronald Koeman landsliðsþjálfari og Memphis Depay, sem hefur ekki getað skilað sér á æfingar. AFP/Koen van Weel

Knattspyrnumaðurinn Memphis Depay, sóknarmaður Corinthians í Brasilíu og hollenska landsliðsins, gat ekki ferðast frá Brasilíu til Hollands á sunnudagskvöld vegna þess að vegabréfi hans var stolið.

Depay átti að koma til móts við hollenska landsliðið í gær þar sem liðið á leiki gegn Möltu og Finnlandi í undankeppni HM 2026 í vikunni.

Ekkert varð hins vegar af því þar sem Depay tilkynnti lögreglyfirvöldum í Sao Paulo að vegabréfi hans hafi verið stolið.

Leikur á Möltu á fimmtudag

Í tilkynningu frá hollenska knattspyrnusambandinu kom fram að Depay væri að gera allt sem í sínu valdi stæði til þess að skila sér til Hollands eins fljótt og auðið er.

Leikur Hollands gegn Möltu er á útivelli á fimmtudagskvöld og hefur sóknarmaðurinn því knappan tíma til þess að geta tekið þátt í undirbúningi liðsins fyrir leikinn.

Depay er markahæsti leikmaður í sögu hollenska landsliðsins með 52 mörk í 104 landsleikjum.