„Nú er ég laus við þessa leiðindaspurningu, um hvort ferillinn minn geti talist fullkominn án ólympíugullverðlauna. Nú er búið að eyða þessari spurningu,“ sagði Austurríkismaðurinn Marcel Hirscher, eftir sigur sinn í alpatvíkeppni á Vetrarólympíuleikunum í Pyeongchang.

Þessi 28 ára gamli skíðamaður hefur átt magnaðan feril í alpagreinum og meðal annars unnið heildarstigakeppni heimsbikarmótaraðarinnar sex ár í röð. Hann þykir afar sigurstranglegur í svigi og stórsvigi í Pyeongchang en átti þar til í gær aðeins ein ólympíuverðlaun í sínu safni, úr stórsvigi í Sochi fyrir fjórum árum. Það virtist því þungu fargi létt af kappanum í gær:

„Það hafa allir verið að segja: „Flottur ferill, en það vantar ennþá ólympíugull“. Þetta er fullkomið, ótrúlegt. Ég er ekki á leiðinni heim á morgun en ég gæti það ef ég vildi því ég er þegar búinn að ná stóra markmiðinu mínu. Það bjuggust allir í Austurríki við því að ég kæmi heim með að minnsta kosti ein gullverðlaun. Ég er himinlifandi, enda bjóst ég ekki við því að vinna þau í tvíkeppninni,“ sagði Hirscher.

Þetta gætu verið síðustu leikarnir þar sem keppt er í alpatvíkeppni, en í þeirri grein er keppt í bruni og svigi og tíminn úr hvorri grein lagður saman. Hirscher náði 12. besta tíma í bruninu sem dugði til því hann var fljótastur í sviginu og endaði samanlagt 23/100 úr sekúndu á undan Frakkanum Alexis Pinturault. Hætta á alpatvíkeppni í heimsbikarnum veturinn 2019-2020 og líklegt er að alþjóða ólympíunefndin taki greinina út af leikunum í kjölfarið, í algjörri óþökk Hirscher og fleiri sem bent hafa á hve ríka sögu alpatvíkeppni eigi sér.

Nánari umfjöllun um Vetrarólympíuleikana má finna í íþróttablaði Morgunblaðsins sem kom út í morgun.

Tengdar fréttir

Vetrarólympíuleikar 2018

Lokaathöfn Vetrarólympíuleikanna - myndasyrpa

• Sú sigursælasta fékk síðasta gullið
• Rússar fögnuðu eftir framlengingu
• Snorri mun bera fána Íslands
• Heimamenn atkvæðamiklir í skautaati

» Fleiri tengdar fréttir