Átta þjóðir eiga lið

Arsenal vann einvígi sitt við AC Milan samtals 5:1 og kom sér þannig í 8-liða úrslit Evrópudeildarinnar í knattspyrnu í gær. Arsenal var með vænlega stöðu eftir fyrri leik liðanna, 2:0-útisigur, en lenti undir í fyrri hálfleik í gær. Danny Welbeck jafnaði metin eftir afar strangan, eða rangan, vítaspyrnudóm, og þeir Granit Xhaka og Welbeck bættu við mörkum í seinni hálfleiknum.

„Við þurftum á þessu að halda. Við gáfum tóninn í síðustu viku í Mílanó. Þetta snerist bara um að klára þetta eins og fagmenn í kvöld. Við byrjuðum þó ekki vel en það vakti okkur. Við hefðum kannski ekki valið að mæta AC Milan en við sýndum að við getum haft betur gegn toppliðum í Evrópu,“ sagði Jack Wilshere, leikmaður Arsenal.

Dregið verður í 8-liða úrslit í hádeginu í dag og þar verða fulltrúar átta ólíkra landa, en ásamt Arsenal verða í skálinni lið Atlético Madrid frá Spáni, Marseille frá Frakklandi, Lazio frá Ítalíu, Sporting Lissabon frá Portúgal, RB Leipzig frá Þýskalandi, CSKA Moskva frá Rússlandi og RB Salzburg frá Austurríki.