HK leikur til úrslita um Íslandsmeistaratitil karla í blaki eftir að hafa snúið blaðinu hressilega við í þriðja leiknum gegn Þrótti frá Neskaupstað í undanúrslitunum í Fagralundi í dag.
Norðfirðingar byrjuðu mun betur en þeir unnu fyrstu hrinu 25:15 og aðra hrinu 25:23 og voru því komnir í vænlega stöðu, 2:0 yfir.
HK jafnaði hins vegar metin, vann 25:18 og 25:18 í þriðju og fjórðu hrinu. Úrslitahrinan var jöfn og tvísýn en HK átti góðan endasprett, vann hana 15:12 og þar með leikinn 3:2.
Gary House og Andreas Hilmir Halldórsson gerðu 16 stig hvor fyrir HK og Ismar Hadziredzepovic 13. Hjá Þrótti var Miguel Mateo að vanda atkvæðamestur með 29 stig.
HK vann einvígið 3:0 og mætir KA eða Aftureldingu í úrslitum en staðan í einvígi þeirra er 1:1 og þriðji leikur á Akureyri annað kvöld.