Mjög ánægður með árangurinn

„Þetta er mikil upplifun og var mikið stærri viðburður en ég hafði reiknað með,“ sagði skíðamaðurinn Hilmar Snær Örvarsson sem er nýkominn heim eftir vel heppnaða för og þátttöku á Vetrarólympíumóti fatlaðra í Pyeongchang í Suður-Kóreu.

„Keppendur voru mjög margir og alveg ótrúlegur fjöldi af sjálfboðaliðum að vinna í kringum mótið sem er sannarlega það langstærsta sem ég hef nokkurn tímann tekið þátt í,“ sagði hinn 17 ára gamli ólympíufari í sjöunda himni með þátttökuna. Hann er staðráðinn í endurtaka leikinn að fjórum árum liðnum.

Hilmar Snær var eini íslenski keppandinn á mótinu. Hann hafnaði í 13. sæti í svigi af 40 keppendum í standandi flokki hreyfihamlaðra, LW2, og hreppti 20. sæti í stórsvigi. „Ég er mjög ánægður með árangurinn. Fyrir utan að ég gerði lítils háttar mistök í fyrri ferðinni í sviginu, seinni keppnisgreininni minni á laugardaginn. Annars er ég mjög sáttur við mig,“ sagði Hilmar Snær sem var að taka þátt í sínu fyrsta stórmóti með stóru essi á ferlinum. Hann er jafnframt yngsti keppandi sem Ísland hefur sent á Vetrarólympíumót fatlaðra.

Hilmar segir aðstæður á keppnisstað hafa verið fyrsta flokks enda var hann byggður sérstaklega upp til þess að halda Vetrarólympíuleikana og vetrarólympíumótið en kröfur Alþjóðaólympíunefndarinnar til aðstæðna á mótum eru miklar. „Það var frábært að taka þátt.“

Sjá allt viðtalið við Hilmar í íþróttablaði Morgunblaðsins í dag