Íslenska karlalandsliðið í blaki tapaði gegn Moldóvu í þremur hrinum í annarri umferð undakeppni Evrópumótsins í Digranesi í kvöld.
Íslenska liðið, sem er að leika frumraun sína í undankeppni Evrópumótsins, tapaði fyrsta leiknum gegn Slóvakíu á miðvikudaginn var og aftur í kvöld en Moldóva vann allar þrjár hrinur kvöldsins. Gestirnir unnu fyrstu tvær örugglega; 25:12 og 25:11, en íslenska liðið beit frá sér og var nálægt því að vinna þriðju hrinuna sem fór þó að lokum 25:22, Moldóvum í vil.
Íslenska liðið ferðast næst til Svartfjallalands og mætir þar heimamönnum á miðvikudaginn kemur.