Guðbjörg Jóna Bjarnadóttir varð í kvöld ólympíumeistari ungmenna í 200 metra hlaupi og bætti hún eigið Íslandsmet í annað skipti á tæpri viku á Ólympíuleikum sem fram fara í Buenos Aires í Argentínu. Hún hljóp á 23,47 sekúndum í kvöld og bætti sig um 0,08 sekúndur.
Guðbjörg var með næstbesta tíma allra í kvöld, en hún varð með yfirburði í fyrri umferðinni og samanlagður árangur í tveimur hlaupum gildir á mótinu.
Hún var samanlagt á tímanum 47,02 sekúndum, 0,67 sekúndum betri en Dalia Kaddari frá Ítalíu sem varð önnur. Leticia Lima frá Brasilíu varð þriðja á 47,87 sekúndum.
Guðbjörg er nú búin að vinna gullverðlaun á Norðurlanda- og Evrópumóti ungmenna, sem og Íslandsmeistaramóti fullorðinna á árinu og bætti hún ólympíugulli í safnið.