Aganefnd Íshokkísambands Íslands úrskurðaði í dag aðstoðarþjálfara Fjölnis-Bjarnarins í langt keppnisbann vegna skilaboða sem hann sendi dómara. Málið var greinilega litið alvarlegum augum og aganefndin meðhöndlaði skilaboðin sem hótanir.
Forsaga málsins er sú að klukkan 17:55 hinn 16. nóvember síðastliðinn fékk yfirdómari Íshokkísambandsins skilaboð í gegnum Facebook frá Trausta Bergmann, aðstoðarþjálfara karlaliðs Fjölnis-Bjarnarins sem leikur í Hertz-deildinni. Þá um kvöldið fór fram leikur í deildinni á milli SR og Fjölnis-Bjarnarins.
Í gær 20. nóvember tilkynnti yfirdómarinn atvikið formlega til aganefndarinnar sem tók málið fyrir í dag. Í úrskurði hennar segir meðal annars:
„Aganefnd ÍHÍ metur svo að í skilaboðunum hafi falist hótun með þann tilgang að hafa áhrif á gang leiks sem er meðal annars brot á reglu Alþjóðaíshokkísambandsins (IIHF) nr 116.“
Niðurstaða aganefndar er eftirfarandi:
„Trausti Bergmann aðstoðarþjálfari meistaraflokks karla Fjölnis-Bjarnarins er úrskurðaður í 24 mánaða bann frá þátttöku í allri starfsemi sem fer fram á vegum ÍHÍ frá og með 21. nóvember 2018. Fjölnir – Björninn íshokkídeild er sektuð um kr. 50.000.“
Niðurstaða aganefndar ÍHÍ er endanleg í íshokkíhreyfingunni hérlendis og verður ekki áfrýjað.