Síðari leikur argentínsku erkifjendanna í River Plate og Boca Juniors í meistarakeppni félagsliða í fótbolta í Suður-Ameríku fór loks fram á Santiago Bernabéu-leikvanginum í Madríd í kvöld. Svo fór að River Plate hafði betur, 3:1 og tryggði sér Suður-Ameríkumeistaratitilinn.
Staðan eftir fyrri leikinn var 2:2, en fresta þurfti síðari leiknum nokkrum sinnum vegna óláta stuðningsmanna. Ekki var hægt að leika leikinn á heimavelli River Plate og var hann því færður til Madrídar.
Boca Juniors byrjaði betur og Darío Benedetto skoraði eina mark fyrri hálfleiks á 44. mínútu. Lucas Pratto jafnaði á 68. mínútu og var ekki meira skorað í venjulegum leiktíma og því þurfti að framlengja.
Snemma í framlengingunni fékk Wilmar Barrios í liði Boca Juniors sitt annað gula spjald og þar með rautt. River Plate-menn nýttu sér liðsmuninn og Juan Quintero skoraði annað mark þeirra á 109. mínútu.
Fernando Gago hjá Boca þurfti síðan að fara af vell vegna meiðsla undir blálokin og var liðið búið með skiptingarnar sínar. Boca-menn léku því tveimur mönnum færi á lokakaflanum. Gonzalo Martínez innsiglaði 3:1-sigur River með marki í uppbótartíma síðari hálfleiks framlengingarinnar og þar við sat.