Tíu stjórar sem koma til greina hjá United
Setja bókamerki
Það hefur eflaust ekki farið framhjá neinum að Jose Mourinho var rekinn frá Manchester United í dag eftir mjög erfitt tímabil til þessa. Breski miðillinn Guardian tók í dag saman tíu líklega eftirmenn Mourinho hjá United.
Zinedine Zidane
Þessi fyrrverandi franski landsliðsmaður er án starfs sem stendur. Hann yfirgaf Real Madrid síðasta sumar eftir sigur á Liverpool í úrslitaleik Meistaradeildarinnar og var það í þriðja skiptið í röð sem hann vann keppnina. Ólíklegt þykir að hann verði laus fyrr en næsta sumar, sem gæti hentað United vel.
Mauricio Pochettino
Menn á Old Trafford eru hrifnir af Pochettino eftir góðan árangur með Southampton og Tottenham. Hann lék m.a með Espanyol og PSG áður en hann fór í þjálfun. Hann tók við Tottenham árið 2014 og hefur stýrt liðinu til fimmta, þriðja, annað og þriðja sæti í ensku úrvalsdeildinni til þessa. Tottenham hefur í tvígang á þeim tíma endað fyrir ofan United, þrátt fyrir að vera með mun minni pening til leikmannakaupa.
Eddie Howe
Hinn 41 árs gamli Eddie Howe er búinn að gera gríðarlega góða hluti með Bournemouth og koma liðinu úr D-deildinni og upp í efstu deild. Ekki nóg með það, heldur er liðið orðið býsna gott í efstu deild. Hann spilar sóknarbolta, eitthvað sem stuðningsmenn United eru hrifnir af.
Antonio Conte
Ítalinn náði strax árangri með Chelsea og varð meistari er hann tók við af Jose Mourinho árið 2016. Hann fór með Chelsea í úrslitaleik enska bikarsins á síðasta ári. Síðara árið hans hjá Chelsea var ekki eins gott og var hann að lokum látinn fara í sumar.
Carlo Ancelotti
Gríðarlega reynslumikill Ítali sem er við stjórn hjá Napoli. Hann er fyrir löngu búinn að sanna sig í evrópskum fótbolta enda búinn að vinna Meistaradeildina þrisvar. Hann er svo með reynslu úr enska boltanum eftir tímann sinn hjá Chelsea. Það gekk hins vegar ekki eins vel hjá Bayern München.
Diego Simeone
Argentínumaðurinn er búinn að vera orðaður við fjölmörg störf á síðustu árum en hann hefur haldið tryggð við Atlético Madríd og verið hjá félaginu í sjö ár. Hann er búinn að ná virkilega góðum árangri í baráttu við Barcelona og Real Madrid, sem eru með mun meiri pening til að vinna með. Hann er búinn að vinna spænsku deildina einu sinni, Evrópudeildina tvisvar og tvisvar komist í úrslit Meistaradeildarinnar.
Laurent Blanc
Þekkir Manchester United vel, enda lék hann með liðinu á sínum tíma og varð enskur meistari einu sinni. Hann er ekki búinn að stýra liði síðan hann yfirgaf PSG árið 2016. Þar á undan stýrði hann franska landsliðinu, en hætti eftir að hann féll úr leik í átta liða úrslitum á EM 2012.
Michael Carrick
Carrick er búinn að vera í þjálfarateymi Mourinho að undanförnu og hefur hann lýst yfir áhuga á að verða aðalþjálfari. Hann hefur hins vegar ekki mikla reynslu og kemur þetta tækifæri eflaust of snemma fyrir mann sem þekkir alla hjá félaginu.
Gareth Southgate
Fór með enska landsliðið alla leið í undanúrslit á HM í sumar og er landsliðið að ganga í gegnum endurnýjun lífdaga undir stjórn Southgate. Hann nær því besta út úr ungum leikmönnum og varð enska liðið efst í erfiðum riðli sínum í Þjóðadeildinni.
Ryan Giggs
Tók við United í skamman tíma eftir brottrekstur David Moyes árið 2014. Undir hans stjórn vann liðið tvo leiki, gerði eitt jafntefli og tapaði einum leik. Hann er búinn að vera landsliðsþjálfari Wales síðan í byrjun árs er hann tók við af Chris Colemann. Úrslitin hjá landsliðinu eru búin að vera misjöfn síðan þessi Manchester United goðsögn tók við.
Hjón sluppu með skrekkinn
„Menn eru bara búnir að forgangsraða“
Ofsóttur innan veggja Boeing
„Það er skiljanlegt að þolinmæði þeirra sé lítil“
Kveðst tala af virðingu: „Ég er enginn dóni“
„Þögnin er ærandi“
Ekki byggt í takt við áform sveitarfélaga