Átta ára bann fyrir hagræðingu úrslita

Juan Carlos Sáez fékk háa fjársekt og átta ára keppnisbann ...
Juan Carlos Sáez fékk háa fjársekt og átta ára keppnisbann fyrir hagræðingu úrslita. AFP

Tenniskappinn Juan Carlos Sáez frá Síle hefur verið úrskurðaður í átta ára bann fyrir hagræðingu úrslita en það er BBC sem greinir frá þessu. Þá þarf hann að greiða 10.300 pund í sekt en það samvarar 1,5 milljónum íslenskra króna.

Sáez er 28 ára gamall en hann var boðaður í yfirheyrslur hjá Alþjóðatennissambandinu vegna óeðlilegra veðmála í kringum leiki hans. Sáez neitaði að afhenda síma sinn til frekari rannsókna en hann var um tíma i 230. sæti heimslistans árið 2015.

Þá viðurkenndi Sáez í samtali við fjölmiðla að hafa fengið beiðnir um hagræðingu úrslita en Sílemaðurinn lét aldrei vita af því. Sáez er í dag í 1.082. sæti heimslistans en hann má ekki keppa aftur í tennis fyrr en árið 2027.

mbl.is