Sveindís Jane Jónsdóttir, framherjinn ungi hjá Keflavík, var besti leikmaður úrvalsdeildar kvenna, Pepsi Max-deildarinnar, í septembermánuði, samkvæmt M-gjöfinni, einkunnagjöf Morgunblaðsins.
Eins og fram kom í þriðjudagsblaðinu var Sveindís jafnframt besti leikmaður tímabilsins í heild, samkvæmt M-gjöfinni, en hún varð efst í henni með samtals 19 M í 17 leikjum sem hún spilaði með Keflavík.
Í september, þar sem þrjár síðustu umferðir deildarinnar voru leiknar, fengu þær Sveindís og Hallbera Guðný Gísladóttir, vinstri bakvörður Íslandsmeistara Vals, flest M eða fjögur hvor. Sveindís hlýtur útnefninguna því hún fékk M í öllum þremur leikjunum, tvisvar eitt og einu sinni tvö, á meðan Hallbera fékk tvisvar tvö M en ekkert í einum leikjanna.
Þetta er í annað sinn sem Sveindís er leikmaður mánaðarins á þessu tímabili en hún varð líka efst í júnímánuði. Þessir leikmenn fengu útnefningarnar fyrir hvern mánuð fyrir sig:
Maí: Cloé Lacasse, ÍBV.
Júní: Sveindís Jane Jónsdóttir, Keflavík.
Júlí: Hallbera Guðný Gísladóttir, Val.
Ágúst: Elín Metta Jensen, Val.
September: Sveindís Jane Jónsdóttir, Keflavík.