Íslandsmótið í kumite, bardagahlutanum af karateíþróttinni, fór fram í Fylkisskemmunni í Norðlingaholti í dag og lauk um hádegið með úrslitaviðureignunum í flokkum fullorðinna.
Iveta Ivanova og Ólafur Engilbert Árnason, sem bæði eru úr Fylki, urðu Íslandsmeistarar í opnum flokkum kvenna og karla.
Iveta sigraði Maríu Helgu Guðmundsdóttur úr Þórshamri í úrslitaviðureigninni í kvennaflokki og Telma Rut Frímannsdóttur úr Aftureldingu hafnaði í þriðja sæti.
Ólafur sigraði Þorstein Freygarðsson úr Fylki í úrslitaviðureigninni í karlaflokki en þeir Elías Snorrason úr KFR og Máni Karl Guðmundsson úr Fylki deildu þriðja sætinu.
Þau Iveta og Ólafur náðu hins vegar ekki að sigra í sínum þyngdarflokkum og urðu þar bæði í öðru sæti.
Agnar Már Másson úr Þórshamri sigraði í -60 kg flokki karla, Máni Karl Guðmundsson úr Fylki í -75 kg flokki karla, Elías Snorrason úr KFR í +75 kg flokki karla, Telma Rut Frímannsdóttir úr Aftureldingu í +61 kg flokki kvenna og María Helga Guðmundsdóttir úr Þórshamri í -61 kg flokki kvenna.